西裝骨骨的史泰祖醫生（Louis），骨子裏並不文靜，他回想小時候最愛通山跑，
每星期日跟隨父母，跨過山頭上教堂去，至今延續這家族傳統，每逢假期，
跟3個仔女上山下海，懶理猛烈陽光，不怕泥濘弄污雙腳，一於將生命影響生命，
他說：「面對浩瀚嘅大自然，小朋友知道自己幾咁渺小，才可以學識咩叫包容，個人都開朗啲！」
撰文：艾叮
攝影：董立華（部份被訪者提供）

跟史泰祖談話，他總是態度溫婉，談起兒女，更是笑得眼瞇瞇。史泰祖是著名皮膚科醫生，半個公眾人物，也是半個親子專家，因為他是「名人父親」，也因為他有3個兒女，其中大女丹丹患有唐氏綜合症，聽起來看似令人遺憾的故事，史泰祖卻驕傲的說：「我個女丹丹，全香港都識，哈哈哈！」

大自然教人寬容

「最初知道女兒有病，當然花上一點時間接受，總有個磨合期。時間久了，領悟到並唔係咩大問題。我哋上下一起去面對，變得更團結，佢凝聚咗我哋。佢有時頑皮，好簡單，跟人家說對不起就是了。」
看似大問題，退後一步，就覺海闊天空。
「帶小朋友到郊外，看看花草樹木，坐喺石上看海，甚麼煩惱也消除，你坐着嘅石頭，都幾千年啦！做人係要看化看透。」
看來天大的問題，史泰祖都可以很鬆容面對。時有年輕人輕生的新聞，講到底，都因為他們太執着。
「再大嘅問題轉眼間就過，多去郊外，就知道自己有多渺小，面對嘅問題在宇宙中是多麼微不足道，個人開朗寬容些，對人生都有所領悟。」

觀鳥種菜上自然課

仔女在加拿大長大，親近大自然是最好的娛樂，囝囝愛釣魚，大女丹丹愛寫生，細囡愛種花，一家人在郊外，好不忙碌。
「以前喺加拿大，放咗幾個巨型餵飼器喺花園，一到冬天，就有幾十種雀鳥飛嚟食Buffet（自助餐）。」
於是，史泰祖就在屋內貼上雀鳥品種圖，跟囡囡一邊睇一邊認，閒時種瓜菜，打理果樹，跟仔女上最真實的自然課。去年史泰祖買下上水村屋，有花園、草地、泳池，重拾在加拿大的感覺。
「家每逢星期日我哋都嚟，打理吓啲花，做吓運動，阿女寫生，阿仔玩遙控直升機。」

拿蚯蚓釣魚無有怕

小朋友最鍾意模仿，最容易的方法是給他們一個學習的榜樣。
「去釣魚，拎起蚯蚓同魚釬就去，紅色肉淋淋，你唔拎起，佢地都唔敢掂，你示範佢哋就跟住做！」
爸爸不怕污糟，阿仔都不怕，爸爸鍾意睇雀，阿女都跟着學觀鳥。
「如果爸爸叫仔女唔好食煙，自己成身煙味，佢哋點會唔知？以身教，想小朋友敬老，自己都要對老人家好，如果唔係，將來都唔使旨意佢哋對你好。」
到了青少年階段，一個二個都跑去行商場，看電影，釣魚？提不起興趣了。
「我係釣魚狂，一放假就去釣魚，初時阿仔都好鍾意，到十幾歲就開始埋怨話悶。」
最近，廿多歲的囝囝重燃對釣魚的興趣。
「細個鍾意，原來人大咗，一樣鍾意，最近佢同我講，一直都好記得，4歲時第一次釣到條魚嘅情況，連一啲細節佢都記得好清楚。」

靠雙手解決問題

不少名人第二代都有工人照顧，嚷父母買玩具，問父母拿零用錢，嬌生慣養。
「喺加拿大成日同小朋友去露營，嘢食跌咗落地，用水沖沖佢咪得，未必一定有乾淨水，都唔一定有紙巾。」
讓小朋友知道，生活不一定優質，不一定凡事有工人打理。
「等佢哋學吓包容，唔使執着一定要食得好，與大自然為伴，可以好Casual，冇嘢係必然！」
慢慢小朋友會愛上大自然，知道要愛護大自然，去露營，捉魚生火，可靠自己雙手去解決問題，最簡單如水，也不一定伸手就有。史泰祖是著名醫生，要以車接送仔女完全不成問題，可是他沒有這樣做。
「我最鍾意搭地鐵，成日同小朋友講，Daddy日日搭地鐵，成日行好多路，人都健康啲！佢哋都知道搭的士，係有需要才做嘅事，家佢哋返工都係搭地鐵、小巴，趕時間先截的士。」

愛種杜鵑如教子女

史泰祖最愛種杜鵑，因為粗生易打理，正如他湊仔女的方法，不用多打理，讓他們多接受不同事物，建立自己一套。
「咁樣係最好嘅相處方法，以前我都想仔女做醫生，但佢哋有自己興趣，咪放手畀佢哋發揮，唔開心又點會做得好。咁唔緊要啦，如果佢哋為咗討好我而做，咪仲唔好！」
現在年輕一輩的家長，時刻都保持警剔，常叫小朋友洗手，讓環境保持清潔。
「我唔係敏感專家，不過我聽過兒科醫生朋友講，家嘅小朋友多咗敏感，成長環境太乾淨，小朋友身體少咗挑戰。」
小朋友受盡保護，長大後怎面對風高浪急的社會？

史家傳統
逢假日到郊外捉魚種花，似乎是史家的傳統，「細個住觀塘，逢星期日一家人去聖堂，最近要到佐敦谷嘅教堂。」攀過山頭，才到家附近的聖堂，「沿住山路行，山路好窄，唔只用雙腳，要用埋雙手嚟行！」史泰祖的爸爸熱愛大自然，經過山頭遇上靚花靚草，如夜百合、跳舞蘭，總想帶它們回家，受爸爸感染，慢慢史泰祖也迷上花花草草。
家後是山，旁邊是海，最大的娛樂就是跟哥哥到溪澗捉魚，往田裏掘番薯，「掘完番薯，搵幾塊木板生火，就可以燒嚟食喇！」小時生活不如現時優質，最大的娛樂就是通山跑，跟爸爸捉魚，現時他延續家庭傳統，帶小朋友到郊外釣魚，以生命影響生命，「見到大自然咁偉大，人都包容啲。」

戶外親子 訓練獨立
多去郊外，吸收新鮮空氣，小朋友身體更好，香港教育學院特殊教育與輔導學系助理教授吳鴻雁指，香港地方小，學校或家裏沒有太多空間，到戶外活動是很好的親子活動。吳鴻雁曾跟多個諾貝爾獎得主做訪問，發覺他們小時候，花很多時間在戶外，可能是在樹林裏或山上。多出外，可加強小朋友的獨立能力，不是凡事都需父母照顧，讓小朋友出外闖一闖，有問題自己解決，變得更獨立。
而且吳鴻雁認為，親身觀察是最好的學習，跟他們接觸大自然，訓練他們的觀察能力，多認識不同的動植物，邊郊遊，邊跟他們談環保訊息，讓他們知道要愛護大自然，更有公德心。現時生活優質了，吳教授指小朋友太多時候看電視、玩電腦，應多到郊外，了解大自然，也可跟其他小朋友多溝通。

親密一刻
名人明星夾於事業與家庭中間，抗壓能力特別強。他們與子女相處之道，是言教也是身教，在人生的長河，滴滴是智慧的噴泉。