華上季自購馬「金鼎之寶」自去年最後一戰，於谷中一千米上陣，連同上仗1600米，走勢都乏善可陳，但霍勵賢一直不肯放手，且視之為愛駒，晨課無論快跳踱步，全部都盡量不假手於人，馬房指出續有進步下，今戰轉跑千四米，隨時有突破性演出，事實上「金鼎之寶」馬主團體經理人之一翁炳輝，名下「青春得意」出道都未嘗入圍，梁定華同佢相當老友，自然想於從練最後一季交代，而且「青春得意」馬身收得越來越靚，今戰千四米都唔好睇小，小心爆劑杰。
 

巫斯義泰國度假轉運
年初三賀歲賽未跑，咁快講初八好似早，但有單不妨存記；巫斯義昨日飛去泰國布吉玩幾日，臨飛前仍然到場，第一隻先試大摩隻「紅旗勇將」，操完再同大摩傾一輪，呢匹馬已報下周日一級賽1200米主席短途獎，未來動向不妨繼續跟進。講開阿巫，前晚3匹頭馬「神州八號」、「綠豆爽」、「橫掃千軍」，對上一場都仲係佢騎，點知一換人全部贏晒，認真冇「飛士」，有馬房仔噚朝見到，話佢表情相當麻麻，睇玩完返，又能否轉個靚運！
 

郭能對摩廐津津樂道
上星期兩匹摩重兵，「包裝選擇」及「包裝博士」拉走，佢親家隻「旗幟鮮明」上周末咁又整親腳退出，不過馬房話呢匹好馬唔打算隨隊過檔，昨晨郭能更第一匹就操，以表重視。講到郭能，佢對大摩另一駒「津津樂道」又係當正仔咁，早前馬偉昌試一課，跟手郭能一到即攬到實，且已連續跳三課，睇得出相當情有獨鍾，早前「津津樂道」因為發過燒，體重一度大幅下降，但近兩個禮拜已漸漸回升，火氣力度亦得好，今戰1400米應該有計。